أقلام ثقافية

مع الزجّال التونسي عبد الحكيم زرير

ظلّ الأدب العربيّ المنطوق والمكتوب باللّسان اليوميّ على هامش الأدب العربيّ الفصيح  بالرّغم من إبداعاته الزّاخرة بالقيم الفنيّة والاِجتماعية إنّه أدب الحياة في أدقّ تفاصيلها النابضة بالشّجون والمعاناة

من آخر ما سمعت من القصائد قصيدة - البالة - للشاعر عبد الحكيم زرير في نادي القراءة بجمعية ابن عرفة وهي قصيدة من الشعر التونسي باللغة اليومية وـ البالة ـ كلمة سائرة على اللسان التونسي وهي كلمة مشتقة من أصلها الفرنسي من فعل emballer وتعني ذلك الكيس الذي يلفون فيه الثياب المستعملة والتي أصبحت أكوامها منشورة في كامل أسواق البلاد وغزت حتى الساحات والشوارع الرئيسية في العاصمة تونس حيث تسمع الباعة ينادون بأعلى الأصوات - م البالة ..م البالة…م البالة…أي أن هذه الثياب حضرت للتوّ فترى القوم رجالا ونساء وشبابا مقبلين عليها يتفحّصونها ويختارون ما يناسبهم من مختلف قطع الملابس وأنواعها من الحذاء إلى القبعات ومن الثياب الداخلية إلى المعاطف ومن الحقائب إلى النظّارات وقد يظفر أحدهم أحيانا بقطع من الملابس جديدة لم تستعمل أبدا وعلامة المحلّ أو المصنع ما تزال مثبّتة عليها .

الشاعر عبد الحكيم زرير نقل كل هذه المعاني والدلالات في قصيدته بأسلوب طريف وهزلي وبكثير من الإيحاءات وفي إيقاع حواريّ يجعل السامع يردّد معه لازمته الشعرية عند نهاية كل مقطع وهي : م البالة….م البالة

القصيدة حاملة لأبعاد اجتماعية واضحة فهي تعبّر عن الحالة الرثّة التي صار يعيش فيها أغلب الشعب التونسي وهذا هو الإبداع ضمن اللغة اليومية ذات الخصائص الفنية الطريفة إضافة إلى معانيها وإشاراتها الاجتماعية والاقتصادية والسياسية الأخرى….م الباله….م الباله….م الباله…كل شيء في الباله…. أعان الله الشعب على سوء أحواله !!

* القصيدة

ــــــ البالَة ـــــــ

1- البالة البالة البالة

اليوم ناسي في حالة

نسوان مع رجّالة

بالبالة ممحونين

2- الشعب اليوم في حالة

لسوام طلعت شعّالة

صبح عايش عالحثالة

ما تسئلنيش منين

مالبالة

3- بو العيلة آشكون بيه

وسميڨ آشباش يززّيه

آشكون يلبّس فيه

واللهِ عندو سنين

مالبالة

4- أنا ومرتي وصغاري

وما عنديش ما نداري

مستور وحق الباري

ما تسئلنيش منين

مالبالة

5- حبيبي وخويا علاّلة

يتلفنلي يقلّي تعال

توّة حلّيت البالة

نقلّو استنّى درجين

منڤالة

6- هذِيّ اللّبْسَة شْبِيهَا

شِنُوَّة الخايِبْ فِيهَا

مانيشِ مِسِتِيكِي فِيها؟

مَا تِقُلِّيشْ مْنِينْ

مِالبَالَة

7- اش قولك في الكبّوط

بفلسة وزوز خيوط

ومكاتب جلد حوت

ما تقلّيش منين

مالبالة

8- والكسوة موش هبال

وبالصدريّة كمال

حسدني عليها الخال

ما تقلّيش منين

مالبالة

9- اِلسّوريّة شانال

ما خطرتشي عالبال

ومواتية السّروال

ما تقلّيش منين

مالبالة

10- آش قولك في السروال

دجين مالعال العال

ما لبسوشي مارسال

ما تقلّيش منين

مالبالة

11- المريول ديور جديد

مخدوم باباري حديد

ما عندي فيه ما نزيد

وما تقليش منين

مالبالة

12- كرافاتي بالطابع

وهذا العيد الرابع

كي يجينا العيد السابع

ما تقليش منين

مالبالة

13- هالمرسيّاز شبيها

لقيت لبسة وتواتيها

من مدّة انا شاريها

وما تقليش منين

مالبالة

14- بوطي مبطّن وحنِين

وشاري منو اثنين

يِحمل حصحاص وطين

ما تقليش منين

مالبالة

15- الكلّو بالمكشوف

اقربلي شويّة وشوف

لكلاست هاذم صوف

شاريهم بميتين

مالبالة

16- يا خويا يا بن عمي

ساكوش وجلدو غنمي

فيه كتاباتي وقلمي

ما تقليش منين

مالبالة

17- اليُومْ نَعْمِلْ فِي مَرْشَة

بْكِسْوَة رُطْبَة مُوشْ حَرْشَة

ضْرِيتْهأ مُوشْ غَالِيَة بَرْشَة

مَا فَاتِتْشِي الْعِشْرِينْ

مالبَالَة

18- في نصبة عالكيّاس

شريت منها أديداس

راه جاري في البالاص

كبّش يسئلني منين

مالبالة

19- شريتِ لبنتي أمبار

أَمَرِيكِي ومن دنفار

بالتّيكيّة يا فرار

هبلو ويقولو منين

مالبالة

20- برشا ﭭربج وتفش

في كومة متاع دبش

لقيت سبتة جلد حنش

تحفة وتقلّي منين

مالبالة

21- ولقيت سحابة عجب

عكاز بيد ذهب

أرخص من كيلو عنب

اسئلني وقلي منين

مالبالة

22- ونطيحلك بكشكول

بالتّصحاحة متاع جان بول

لا من بوتيك لا مول

زايد تسئلني منين

مالبالة

23- آشقولك في مراياتي

عجبت خويا البياتي

فصالة واللون مواتي

بقى يسئل فيّ منين

مالبالة

24- و سطيّش للحكومة

فيه وريقات ملمومة

مكتوب مصنوع فروما

تحلّفني تقلّي منين

مالبالة

25- الحكومة عملت طلّة

وجاتني بروبة بالحلّة

خرجتلي يا تباركالله

قلتلها منين هالزين

مالبالة

26- خْذِيتِلْهَا زُوزْ سْتَايِرْ

دُنْتَالْ وفِيهَا دْوأيِرْ

مَا كِسْبُوهَاشْ حْرَايِرْ

الأحَدْ مِالمَلاَّسِينْ

مالْبَالَة

27- عندي بنيّة ووليّد

نخمم كيفاش نعيّد

سروال وبوط جديّد

والباقي تقلي منين

مالبالة

28- لولد لقى مريول

أخضر في لون الفول

ومصوّر فيه بريول

يأخذ العقل منين

مالبالة

29- ولبنيّة لقات سوريّة

دنتال وفنطازيّة

فرحانة وتبوس فيّ

آفار تقلّي منين

مالبالة

30- شريت دبيّب لحفيدي

وبكيف صلّحتو بيدي

ما حلمشي بيه وليدي

وزيد اسئلني منين

مالبالة

31- مشيت للسوق ماتينال

لقيت قرص اوريجينال

الأفّيس وفاميليال

بدينار ماهوش باثنين

مالبالة

32- يَا خويا تحبش تلبس

إطلالة على سوق طبّس

خير مالبوتيك وأرخص

هاك تعرف توة منين

مالبالة

***

بقلم سُوف عبيد

في المثقف اليوم