أقلام حرة
المطبخ السياسي: لغز العشاء او الفطور خارج المنزل مع الأصدقاء!!
سؤال تقليدي .. روتيني يسأله أحد رفاق الشلة في حال قررنا العشاء خارج منازلنا والذي عادة مايكون ليلة الخميس او الفطور - يعني الريوك - صبيحة الجمعة أو احدى العطل التي لا تنتهي في العراق فكل أيامنا ..عطل " وين نتعشى اليوم؟" او" وين نتريك؟
وغالبا ما أكون آخر المتحدثين بعد طول صمت وبعد سماع جميع المقترحات لأجيب على نحو مستفز ومقرف - يخرب الطلعه - مصحوبة بصيحة جماعية " اهوووووووووه تالي وياك !!.
- الأول: شنو رأيكم يم قاسم ابو الكص؟ فأقول "يمعودين تريدون نتسمم، الكص كله لحم هندي ملوث بالكلور لأن اللحم الطبيعي او الحقيقي ما يلزم بالشيش!!
- اذن كبة السراي؟ دروح يمعود كلها جلافيط ومصارين من أيام الخير!!
- طيب شنو رأيكم باقلاء بالدهن يم ابن سمينه؟ صدك تحجي تريد يصعد الضغط عدنه!
- اذن كاهي وقيمر من ابو علي؟ مابينه حيل يصعد السكر ونصف الشعب العراقي مصاب بالسكر!
- نكول جبن عرب وشاي مهيل؟ وين انروح من التايفوئيد وحمى مالطا .. منبعها جبن العرب !
- زين نكدر ناكل دجاج مشوي بالتنور ..على الفحم .. ..شواية ...كنتاكي؟ الدجاج كله اكسباير فضلا عن كونه محقون بمواد كيمائية لتسمينه اضافة الى أنه غير مذبوح على الطريقة الأسلامية وانما صعقا بالكهرباء او ميتة تم ذبحها لاحقا !!
- تمن ومرق؟ يعني بالبيت تمن ومركه وبالطلعة همين!
- همبركر؟ هي مال همبكر بها الزلك!
- مخلمة؟ لحم حمير مخفوقا بالبيض الفاسد!
- جلفراي؟ نفس الشي بدون بيض!
- تشريب؟ يسوي حموضة!
- باسطرمة؟ لحم مضروب متبل بالبهارات والثوم!
- كباب ..تكة ..معلاك ..؟ غالية ومبالغ في غلائها فضلا عن الشكوك بمصادرها وحليتها شرعا !
- شتاكل لعد فدوه اروحلك؟ أفضل شيء وآمن شيء "فلافل" !! وبالنسبة لي سأرجع الى البيت لأتعشى هناك، ألذ وأنظف وأصرف شدكولون؟
أهووووووووو تالي وياك " طالعين من البيت بربطة المعلم حتى ناكل فلافل؟ مو صوجك، صوج اللي يطلع وياك اليوم او اللي ينتخبك غدا!
اذن انتم معادون لصداقتي ..كارهون لصحبتي ..متآمرون على قناعاتي ..محرضون على شخصي ..كارهون لطائفتي ..حانقون على قوميتي ..مشككون بنزاهتي، الويل لكم ثم الويل، اربعة كفتة وكباب تطول الأصدقاء والأقارب والشركاء والأحباب !!
بمعنى وعلى قول البغادة " باكة فجل لاتحلين ..كسرة خبز لتكسرين ..اكلي لمن تشبعين " او
القاه في اليم مكتوفا ثم قال له ..اياك اياك ان تبتل بالماء
#هكذا تقلل السلطة الحاكمة من شأن خيارات المصلحين وتسفهها جهارا نهارا ليبدو للعيان أن خياراتها - العشاء في البيت - او العودة الى نقطة الصفر، هو الخيار الأصلح والأصح والالالالالالا ..نيووووووووو .
